ન હોય કંઈ (ગઝલ)

સો મરજ, એકજ દવા ન હોય કંઈ, 

એક ગીતા સર્વથા ન હોય કંઈ. 

જાતનું મંથન કરી જે સાંપડે, 

એ બધાની સંપદા ન હોય કંઈ. 

જો એ ધારે ને ઉગારી ના શકે, 

કોઈ એવી આપદા ન હોય કંઈ. 

હોય નિષ્ફળતાના લાખો કારણો, 

કમનસીબી સર્વદા ન હોય કંઈ.

એક દીવો હાથવેંતે રાખજો, 

ચાંદની રાતો સદા ન હોય કંઈ.

બહાર કાઢ્યા બાદ પાછા પણ ફરે, 

શ્વાસ માટે કાયદા ન હોય કંઈ.

જિંદગીને મોજથી માણો 'રસિક', 

જિંદગીમાં અન્યથા ન હોય કંઈ. 

~ દેવાંગ પરીખ 'રસિક'