રાજ્જા

કોણે દીઠી કાલ છે, રાજ્જા? 

જીવન બસ અંતરાલ છે, રાજ્જા. 

જનતા તો કંગાલ છે, રાજ્જા, 

રાજા માલામાલ છે, રાજ્જા. 

રસ્તા સીધા, ચાલ છે ટેઢી, 

ને સઘળું ગોલમાલ છે, રાજ્જા.

એ ચાહે તો દુગ્ગી રાજા, 

કિસ્મત માયાજાલ છે, રાજ્જા.

શ્વાસોની આ આવન-જાવન, 

ફોગટની જંજાલ છે, રાજ્જા.

અંધારાને કોસે છે શું? 

ભીતર એક મશાલ છે, રાજ્જા.

મનમાં કાશી, મનમાં કાબા, 

મનમાં તીનો કાલ છે, રાજ્જા.

મનને જીતો, મન માને તો - 

સહરા નૈનિતાલ છે, રાજ્જા. 

આંખો આંજી છે દર્પણમાં? 

અંદર બસ કંકાલ છે, રાજ્જા. 

શ્રીજીને મંદિરમાં શોધે? 

ઘટમાં શું હડતાલ છે, રાજ્જા!?

કાગળ મંદિર, ગઝલો ઈશ્વર, 

ને કલમ કરતાલ છે, રાજ્જા.

~ દેવાંગ પરીખ 'રસિક'