સમજી શકે છે

હાલ મારો એટલા સમજી શકે છે, 

મૌન મારું જેટલા સમજી શકે છે.

જાણતા હોતા નથી જેઓ સ્વયંને, 

એ કહે છે કે મને સમજી શકે છે.

આંખ સાથે છે ગયા જન્મોનું લેણું, 

દુઃખ મારું વાદળી સમજી શકે છે. 

તું અડે તો થાય છે એક ઝણઝણાટી, 

સ્પર્શ તારો ચામડી સમજી શકે છે.

મંદિરોમાં ભીડ ઉમટે રોજ જોવા, 

એક પત્થર જે બધું સમજી શકે છે.

~ દેવાંગ પરીખ 'રસિક'

સંભાળવાનું

રોજ બગડે, રોજ મચડે રાખવાનું, 

કંઈક અંદર રોજ સાજું રાખવાનું. 

આંખની આગળ જે ચાલે, ચાલવા દો, 

આંખની પાછળ બધું સંતાડવાનું.

છે બધા જાણે કે શું છે પામવાનું, 

કેટલાં સમજે છે શું છે ત્યાગવાનું?

અવયવોમાં સંપ રાખો કેટલો પણ, 

કોઈ ને કોઈ તો આડું ફાટવાનું.

જોતજોતાં એક દિ' ઊંધું થવાનું, 

દીકરો કહેશે મને, "સંભાળવાનું."

મોત ટાણે ના પથારીમાં રિબાવે, 

એટલું તું દે, પછી શું માગવાનું?

~ દેવાંગ પરીખ 'રસિક'