ખોટી છે

ન હો આંખોમાં અશ્રુ તો અમારી પ્રીત ખોટી છે? 

વ્યથાને માપવાની આ તમારી રીત ખોટી છે. 

ત્યજીને કેમ બેઠા છો બધું જે માણવાનું છે? 

ખુદાને પામવાની આ તમારી રીત ખોટી છે. 

મગજમાં કાં ભરી રાખ્યું છે તદ્દન ફેંકવા જેવું? 

ભરીને રાખવાની આ તમારી રીત ખોટી છે. 

હો એનો વાંક, બાળકને તમે કંઈ તો સજા આપો, 

સજા ના આપવાની આ તમારી રીત ખોટી છે. 

નથી વાંધો જો ના પાડો, છે બસ એ વાતનો વાંધો, 

મને ના પાડવાની આ તમારી રીત ખોટી છે. 

અમે અળગા રહ્યા સૌથી તો આ દુનિયા કહે અમને, 

ન સાથે ચાલવાની આ તમારી રીત ખોટી છે. 

'રસિક' કંઈ તો કહો શાને તમારી આંખ ભીની છે, 

ન ઉત્તર આપવાની આ તમારી રીત ખોટી છે.

~ દેવાંગ પરીખ 'રસિક'